ဗိုလ်တထောင်ဘုရား ပြိုကျနိုင်သဖြင့် ဆိပ်ခံတံတား စီမံကိန်းရပ်သင့်ဟု ၀န်ကြီးပြော


ရန်ကုန်တိုင်း၊ ဗိုလ်တထောင် ဘုရားလမ်းနှင့် ဗိုလ်အောင်ကျော် တံတားအကြား တည်ဆောက်နေတဲ့ ဆိပ်ခံတံတားကြောင့် နောင်တချိန်မှာ ဗိုလ်တထောင်ဘုရားပြိုကျနိုင်လို့ စီမံကိန်း ရပ်သင့်တဲ့အကြောင်း ပို့ဆောင်ဆက်သွယ်ရေးဝန်ကြီးက လွှတ်တော်မှာ ပြောပါတယ်။

ဒီနေ့ ကျင်းပတဲ့ ပြည်သူ့လွှတ်တော်မှာ ရန်ကုန်၊ ဆိပ်ကမ်း မဲဆန္ဒနယ်မှ ဦးတင်မောင်ဝင်း က ရန်ကုန်မြို့၊ ဗိုလ်တထောင် ဘုရားလမ်းနဲ့ ဗိုလ်အောင်ကျော် တံတားအကြား မြန်မာ့ဆိပ်ကမ်း က ပိုင်တဲ့ မြေဧရိယာ ဧက ၂၀ လောက်ကို အသုံးပြုပြီး ကောင်းမြန်မာအောင် သင်္ဘောကုမ္ပဏီမှ တည်ဆောက်ရေးလုပ်ငန်းတွေ စတင်အကောင်အထည်ဖော်ဖို့ ဆောင်ရွက်နေတာတွေကို ရပ်ဆိုင်းပေးဖို့ အဆိုတင်သွင်းခဲ့ပါတယ်။

ဒီအဆိုနဲ့ပတ်သက်လို့ လွှတ်တော်ဥက္ကဋ္ဌက ၀န်ကြီးဌာနရဲ့ သဘောထားမေးမြန်းရာမှာ ပို့ဆောင်ဆက်သွယ်ရေးဝန်ကြီး ဦးသန့်စင်မောင်မောင်က ခုလို ပြောလိုက်တာ ဖြစ်ပါတယ်။

သူက အခု ဆောက်လက်စ ဆိပ်ကမ်းမှာ ရေကြောင်းကျဉ်းတာကြောင့် တခုခု ပိတ်ဆို့သွားရင် ကျန်တဲ့ ဆိပ်ကမ်းတွေပါ ပိတ်ဆို့ပြီး ကုန်ဝင်ကုန်ထွက် ရပ်တန့် သွားနိုင်တယ်၊ တခါ ဗိုလ်တထောင်ဘုရားပြိုကျသွားနိုင်တယ်လို့ လွှတ်တော်ထဲ ပြောပါတယ်။

“ဗိုလ်တထောင်ဘုရားမြေသည် လှိုဏ်ဂူသဏ္ဌာန်ဆောက်ထားတဲ့ လှိုဏ်ဂူဘုရား ဖြစ်တယ်၊ အောက်ခံ မြေသားက မသေချာပါဘူး၊ ကျနော်တို့ အခု ခွင့်ပြုလိုက်ရင် အခုလည်း မဖြစ်ဘူး၊ နောက်နှစ်လည်း မဖြစ်ဘူး၊ ၁၀ နှစ်လောက်ကြာမှ ဖြစ်ရင် ဒီဟာ ကျနော်တို့မှာ တာဝန်ရှိပါတယ်၊ ၁၀ နှစ်မှပဲဖြစ်ဖြစ် ၁၅ နှစ်မှပဲ ဖြစ်ဖြစ် တခုခုများ ဘုရားရဲ့ အဆောက်အအုံကို ထိခိုက်လာခဲ့ရင် ကျနော်တို့မှာ အပြစ်ဖြစ်သွားမှာ သေချာပါတယ်။”

ဦးတင်မောင်ဝင်းရဲ့ အဆိုနဲ့ပတ်သက်လို့ ကိုယ်စားလှယ် ၅ ယောက်က ထောက်ခံဆွေးနွေးခဲ့ကြပြီး ပို့ဆောင်ဆက်သွယ်ရေးဝန်ကြီး ဦးသန့်စင်မောင်မောင်ကလည်း လွှတ်တော်မှာ ထောက်ခံ ဆွေးနွေးခဲ့ပါတယ်။

အဲ့ဒီနောက် ပြည်သူ့လွှတ်တော်ဥက္ကဋ္ဌ ဦးဝင်းမြင့်က အဆိုနဲ့ပတ်သက်ပြီး ကန့်ကွက်သူမရှိတဲ့အတွက် အတည်ပြုကြောင်း ကြေညာခဲ့ပါတယ်။

ဒီ စီမံကိန်းကို MIC လို့ခေါ်တဲ့ မြန်မာ့ရင်းနှီးမြှုပ်နှံမှုကော်မရှင်က ပြီးခဲ့တဲ့ မတ်လအတွင်း ကောင်းမြန်မာအောင် ကုမ္ပဏီကို လုပ်ပိုင်ခွင့်ချထားပေးခဲ့တာ ဖြစ်ပါတယ်။

မြေပုံမြို့နယ် ပြည်သူ့လွှတ်တော်ကိုယ်စားလှယ် ဦးဖေသန်းက အဆိုနဲ့ပတ်သက်လို့ လုပ်ပိုင်ခွင့်ရထားတဲ့ သူတွေရဲ့အသံကို လွှတ်တော်ထဲ မကြားရဘူးလို့ ပြောပါတယ်။

“တဘက်က လုပ်ပိုင်ခွင့်ရထားသူတွေရဲ့ အသံကို ကျနော်တို့ မကြားရဘူးပေါ့၊ အဆိုတင်သွင်းတဲ့သူတွေရော၊ လွှတ်တော်ကိုယ်စားလှယ်ထောက်ခံမှုတွရော ၀န်ကြီးဌာနက ထောက်ခံတယ်ဆိုရင် ဒီ အဆိုမျိုးက အောင်မြင်ပါတယ်။”

မကြာသေးခင်ကလည်း ရန်ကုန်၊ ဆေးရုံကြီးအနီးက မြေနေရာမှာ ပုဂ္ဂလိကဆေးရုံတခု တည်ဆောက်မယ့် စီမံကိန်းတခု ဖျက်သိမ်းဖို့ လွှတ်တော်က ဆုံးဖြတ်ခဲ့ပါတယ်။

ဒုတိယအကြိမ် လွှတ်တော်အတွင်းမှာ အရင် အစိုးရလက်ထက်က စီမံကိန်းတွေကို ဖျက်သိမ်းသင့်ကြောင်းအဆိုတွေ အောင်မြင်ပြီး အခု အစိုးရလက်ထက် ဆက်လက်လုပ်ဆောင်သင့်ကြောင်း အဆိုတွေ မှတ်တမ်းအဖြစ်သာ ထားတာ များတယ်လို့ ဝေဖန်ချက်တွေလည်း ထွက်ပေါ်နေပါတယ်။

ရွှေအောင် - DVB
Previous
Next Post »
Powered by Blogger.